Mar 3 | HUI | STEP | Yasu ibungoai hagane andaha halu mende anda pene. Anda ogoniha agali mbira gi mbariane kohe hene.

a 3.4Lg 14.3

b 3.5Yo 11.33

c 3.6Md 22.15-16

d 3.8Md 4.25

e 3.9-10Mg 4.1, Lg 5.1-3

f 3.10Md 9.21, 14.36, Mg 5.29, 6.56, Lg 7.21

g 3.11Mg 1.23-24, Lg 4.41

h 3.12Md 8.4, 12.16, Mg 1.34

i 3.16Yo 1.42

j 3.17Lg 9.54

k 3.20Mg 6.31

l 3.21Yo 7.5, 10.20

m 3.22Md 9.34, 10.25

n 3.23Md 4.10, Lg 11.17-22

o 3.27Ais 49.24, Md 12.29

p 3.28-29Md 12.31-32, Lg 12.10, 1Yo 5.16

q 3.31Mg 6.3, Yo 2.12, Ab 1.14

Mark 3

Agali mbira gi kohe hearia Yasuhanda mo dabi henego ogo

(Madiu 12.9-14, Lugu 6.6-11)

1 Yasu ibungoai hagane andaha halu mende anda pene. Anda ogoniha agali mbira gi mbariane kohe hene. 2 Wali agali maru hearume Yasuhondo, Í̠na koore biri, loa howa tigua YasuhandaSabada horongi agali biago mo dabi harabe hondole ti ha para howa hondo hene. 3 Yasuhanda agali gi kohe biagohondo lalu, Heyalu i̱ kogoria íbu, lene. 4 Ani lowa ibugua tihondo lalu, Sabada horongi inanagaMana lowinigome bulene nabulenebi agi lo ngabe. Biamogo bulene lo ngabe be mo ko holene lo ngabe. Wali agali bayale helo pele mulene lo ngabe be homelo bolene lo ngabe, lene. ^a

Ani layagola tigua ladai nabi hene. 5 Yasu ibugua wali agali biaru handalu hearia bu mini giambe ho heago hondowa keba halu agali biagohondo lalu, Í̠naga gi mbariane dogola, lene. Ani layagola agali biagome ibunaga gi mbariane dogo layaore bayale ho dai bini. ^b 6 Ani biyago hondowaPerisi agali hearume tagira pialuHerodo aria hearia puwa, Yasu homelo agi bimabe, lalu lo manda bialu hene. ^c

Wali agali dewaore Galili iba angeni ngoai henego ogo

7 Yasu ibunaga talima piaga biaru heba ti o hayagoria wahalu Galili iba timbuniore bereagoria pene. Ti piyadagua wali agali dewaore Galili howabi Yudia howabi 8 Yarusaleme howabi Idumia howabi iba Yodana edeyagi howabi Taia howabi Saidono howabi dindi uruniha howa wali agali au lole labe nahe Yasuhanda biyago hale howa haruru puwa ibu hearia íbu ngoai hene. ^d 9 Ani ngoai hayagola ibugua wali agali dewa mo dabi hayago hondowa waragobe dewa hearume Yasu ela hole garere bima ibu hearia ibini. Ani biyagola ibiyarume ibu ho gengedoligo lowa Yasuhanda ibunaga talima piaga biaruhondo lalu, Iba talu kaware yalu íbu widaba, lene. ^{e
,} ^f 11 Ani biyagola wali agali dama daragahe hearume Yasu de hondowa ti ibu geha bulu paluwa ga̱ lalu, Í̠ Ngode Datagaliwabe Igini kegoni, lene. ^g

12 Ani layagola ibugua dama biaruhondo bi hongo howa lalu, I̱ Ngode Datagaliwabe Igini kogonigo maru nalamilimu, lene. ^h

Yasuhandaabosolo homberiali (12) dabenego ogo

(Madiu 10.1-4, Lugu 6.12-16)

13 Yasuhanda dindi hombene wiagoria iraga howa agali maru ibuni hamelearu olayagola ti ibu hearia ibini. 14 Ibiyagola ibugua agali homberiali (12) dabowa ogoningi tinaga miniabosolo wini. Ani buwa ibugua tihondo lalu, I̱na tí i̱ heba mandagi hami̱ya dabarugo maha i̱na tígua mana lamule pudaba lolebero. 15 Ani larogola tígua dama daraga karu wara tagi holenenaga hongo karulo holeberami, lene.

16 Yasuhanda agali homberia abosolo helo dabenedaru mini uru Saimono Yasuhanda ibu mini mende Pida winigo ibubi ⁱ 17 Sebedi igini Yamese Yonela henego Yasuhanda libu mini mende Boaneyisi inanaga bi lalu Hari Kulu igini winigo libubi ^j 18 Andurubi Pilibibi Badolomiubi Madiubi Tomasabi Alibiasa igini Yamesebi Tadiasabi Saimono ibu ka̱i̱ miniPaidoro ibubi 19 Yudasa Isagariodo ibu Yasu nde lenego ibubi homberiali (12) uruni Yasuhanda dabene. Ani dabai halu Yasu ibu andaga pene.

Yasu dama Heyolabelanaga te ogo

(Madiu 12.22-32, Lugu 11.14-23, 12.10)

20 Wali agali dewaore lone ngoai hayagola Yasubi ibunaga talima piaga biarubi ti tomo nolene henge nawi hene. ^k 21 Wali agali hearume, Yasu lulu kago, layagola hale howa ibu dameneme Yasu damu pene. ^l

22 Yarusalemeni howaMana lowinigo lawai haga ibiyarume lalu, Dama mini Heyolabe Yasunaga gubaliniha daraga ka, lalu, Yasu ibu dama bibahende karunaga haguane hongoni howa dama karu wara tagi haga ka, lene. ^m

23 Ani layagola Yasuhanda, Ibidaba, lowa tihondo bi yobage lalu, Dama Heyolabeme ibuni agua wara tagi habehe kabe. ⁿ 24 Dindi mbiraoreni howa tini tale bigibigi bu howa wai bia a̱i̱ na̱i̱ biyagua hangu hangu haga haga bu holebira. 25 Hameigini mbiraoreme tini tale bigibigi bu howa wai biyagua hangu hangu haga haga bu holebira. 26 Dama Heyolabeme haru kagoria tale bigibigi bu howa ti wai biyagua bia ho wiaabo habe nahe hangu hangu haga haga bu howa ereba hai holebira, lene.

27 Mbiralime agali hongohe kagonaga andaha ibunaga mbirale ngaru mo kayu bule pobe nahe holebira. Ibugua agali hongohe biago ala gi gebi minu huba bu wiyagua nde mani ibunaga andaha mbirale ngaru mo kayu bule pobehe holebira, lene. ^o

28 Ani lowa Yasuhanda lalu, Tíhondo heneneore larogo. Wali agalime ko bibahende birarubi mege bialu bi ko tara tara lararubi domo wahabehe holebira. ^p 29 Mbiralime Ngode Datagaliwabe Dinini mege biyagua domo wa nahe ibunaga ko ogoni ibuniha wiaaboboore wulebira, lene. 30 Tigua, Yasu gubaliniha dama daraga ka, layagola Yasuhanda bi ogoni lene.

Yasu ai̱ya hamenerunaga te ngago ogo

(Madiu 12.46-50, Lugu 8.19-21)

31 Yasu ibu ai̱ya hamenerume tagirani íbu howa lalu, Yasu tagira ibilo lamidaba, lene. ^q 32 Ani layagola wali agali Yasu heba biru mabu bu berearume Yasuhondo lalu, Í̠ ai̱ya hamene mbalinirume tagirani íbu howa í̠ olara, lalu lamini.

33 Ani lamiyagola ibugua ladai bialu lalu, I̱ ai̱ya hameneru ai imabe, lene. 34 Ani lowa ibugua wali agali biru mabu biaru handa de̱le̱ buwa lalu, De handadaba. I̱ ai̱ya hameneru o bedaruni, lene. 35 Ani lowa lalu, Ngode Datagaliwabehanda hame ledadagua biaga karu ti i̱ hamenebi i̱ mbalinibi i̱ ai̱yabi kagoni, lene.